РЕПУБЛИЧКИ СОВЕТ ЗА БЕЗБЕДНОСТ НА СООБРАЌАЈОТ НА ПАТИШТАТА

На 12 декември 2008 година во хотел Холидеј ин свечено беше промовирана првата Национална стратегија на Република Маке­донија за унапредување на безбедност во сообраќајот на патиштата 2009 – 2014 година.
Републичкиот совет за безбедност на сообраќајот на патиштата  соочувајќи се со порастот на незгодите во патниот сообраќај и последи­ците од нив во последните 5 години, покрај учество во донесување и примена на Законот за безбедност на сообра­ќајот на патиштата и на други релевантни законски и подзаконски акти во областа на безбедноста во патниот соо­браќај, ја изработи Национална стратегија на Република Маке­донија за унапредување на безбедност во сообраќајот на патиштата 2009 – 2014 година.
Собранието на Република Македонија на продолжението на Дваесет и осмата седница, одржана на 11 ноември 2008 година го усвои Предлогот на Националната стратегија на Република Македонија за унапредување на безбедноста на сообраќајот на патиштата од 2009-2014 година.
На промоцијата се обрати Претседателот на РСБСП, м-р Никола Ангеловски, а во името на Владата на Р.М. говореше Министерот за транспорт и врски, г-дин Миле Јанакиевски. Националната стратегија пред присутните ја презентираше проф. д-р Миле Димитровски, координатор за изработка на стратегијата.
Националната стратегија ја подготви координативното тело на Републичкиот совет за безбедност на соо­бра­ќајот на патиштата со експертските групи поддржано од Министерството за внатрешни работи, Министерството за транспорт и врски, Министерството за здравство, Министерството за образо­вание и наука, Министерство за економија, Министерство за животна средина и просторно планирање, Републичкиот завод за здравствена заштита, Јавното претпријатие  „Македонија пат”, Агенцијата за патишта, Авто-мото сојузот на Македо­нија, невла­дините организации и од други релевантни институции и организации.
Национална стратегија  претставува прва стратегија за унапредување на безбедноста на соо­бра­ќајот на патиштата во Република Ма­ке­дони­ја и има цел, предвидувајќи ги долгорочните потреби на државава за преземање плански мерки и активности во областа на безбедноста во сообраќајот на патиштата, да ги реши проблемите во овој сегмент и да гаран­тира дека визијата, идеите и вредностите што се предвидени со неа ќе бидат реализи­рани, преку намалување на бројот на загинати и минимизирање на бројот на деца-жртви во сообраќајот.
Националната стратегија е од суштинско значење за поната­мошните мерки и активности во трите столба (пат - возило - возач) и предвидува применливи алатки за  унапредување на  без­бед­носта на патиштата.
Главните подрачја за дејствување набележани за реализација на Националната стратегија следејќи ги плановите и актите на Европската Унија, предвидува во Република Македонија  да го намали бројот на жртви од сообраќајот со смртни последици за 50% и бројот на загинати деца - жртви, учесници во сообраќајот да изнесува 0 (нула), а ќе се реализираат преку следните актив­ности на дејствување во:

1. Патот и патната инфраструктура;
2. Техничката исправност на возилата;
3. Контролата и регулирање на патниот сообраќај;
4. Превентива и намалување на сообраќајните прекршоци;
5. Јакнење на свеста на граѓаните за потребата од сообраќајна едукација;
6. Намалување на сообраќајната деликвенција во патниот сообраќај во РМ;
7. Воведување безбедни и екотехнологии (green);
8. Континуирана едукација и професионален тренинг.