РЕПУБЛИЧКИ СОВЕТ ЗА БЕЗБЕДНОСТ НА СООБРАЌАЈОТ НА ПАТИШТАТА

Републичкиот совет за безбедност на сообраќајот на патиштатаz на 11 февруари 2009 година во Дом на АРМ одржа тркалезна маса насловена како „Размена на искуства за работата на испитните центри во Р.М.”.
На тркалезната маса присуствуваа претставници од осумте Испитни центри во Македонија, како и претставници на Одделението за сообраќај од МВР и од соодветните СВР по градови. На тркалезната маса беа презентирани досегашните искуства на испитните центри за нивното работење со оглед на фактот дека овој начин на организација на испитите за возачка дозвола е релативно нов во нашата држава. Претставниците на испитните центри ги презентираа позитивните резултати од досегашната работа, но посочија и на некои мали проблеми кои произлегоа од практичното работење на центрите. На крај на тркалезната маса беа подготвени заклучоци кои ќе бидат презентирани пред надлежните институции заради имплементирање во измените на Законот за безбедност на сообраќајот на патиштата кои се во тек, како и во соодветните дополнителни акти кои ја уредуваат оваа проблематика.
Дел од заклучоците предлагаат:
- Од досегашната работа на центрите е очигледно дека бројот на кандидатите кои полагале возачки испит не е во таков обем во однос на минимумот на бројот на испитни Комисии пред­видени во испитните центри и дека тие немаат ни 50% од нормалното оптоварување. Заради овие причини собирот заклучи дека е потребно минималниот број на испитни комисии предви­дени во Законот за безбедност на сообраќајот на патиштата да се промени.
- Постојното законско решение за избор на кадри за Претседатели на Испитни комисии и за Испитувачи за теоретскиот дел, ограничува изборот на кадри да биде само од дел од техничките струки и тоа: технички факултет – сообраќајна насока, полициска академија, правен или педа­гошки факултет. Факт е дека образовните процеси во република Македонија се развиваат и дека репертоарот на кадри  подобни за Претседатели на комисии и за Испитувачи може да биде проширен и на други факултети и студиуми.
- За членовите на Испитните комисии треба да се воведе поседување на Овластување (лиценца) за член на испитната комисија.
- Да се воведе што поскоро (веднаш) електронското полагање на теоретскиот дел од возачкиот испит.
По оваа тркалезна маса, РСБСП планира и одржување на тркалезна маса со претставници на авто школите во Македонија на кое ќе бидат презентирани и нивните искуства од ваквиот начин на работа. На тој начин ќе се добие целосна слика за позитивните и негативните аспекти на ваквото решение за полагање на испити за сите категории на возачки дозволи и можност за подобрување и корегирање на начинот на работа на испитните центри.